Mizote Kut zinga tun thlenga uar taka la hman thin, Chapchar Kut chu tunkar Ningani khan Serchhip-ah urhsun taka hman a ni. Serchhip-ah hian Chapchar Kut hi YMA Sub-Hqrs. Serchhip bultuma hman a niin Field No-II ah Chapchar Kut hi hman a ni a, Kut Pa atan Serchhip District Bawrhsap Pu P.Lalchhuanga hman niin, Kut Nu atan Bawrhsap nupui, Pi Laltlanthangi hman a ni. Chapchar Kut hun hmasa lam hi Organising Committee Vice Chairman, Pu Vanlalhluna chuan kaihruaiin Kut Pa, Pu P. Lalchhuanga chuan khawvel thiamna sang chho zelah kan hnam kalphung leh ziarang te chawinung zel tura tan lak a ngai a ni, tiin, mahni hnam culture hmusit reng reng hnam dingchhuak an awm ngailo, a ti a, kan nihna ze bulpui hi chhuang takin khawvel ngaihsan turin i chawinung zel ang u, tiin mipui kalkhawmte a chah bawk. He hunah hian YMA Sub-Hqrs. President, Pu Lalzuiliana chuan Kut chibai buna thu a sawi bawk a ni.
Chapchar Kut lawmna Hun then hnihna hi Cultural Programme atana hman niin MUP Sub-Hqrs ten Hla Do hmanga bul tanin, Sub-Hqrs YMA Cultural Troupe ten Chheih Zai leh Lam hmuhnawm takin an chhunzawm a, Serchhip P&E Veng Branch YMA, SSA Cultural Academy, Mizoram Youth Club Serchhip Branch leh MCO Sub-Hqrs Serchhip ten arualin sarlamkai an entir bawk a, Serchhip Chanmari Branch YMA in Chawnglaizawn an entir bawk a, Serchhip Hmar Veng Branch YMA leh Sub-Hqrs YMA Cultural Troupe ten Cheraw, Hriangtlang Branch YMA in Sarlamkai leh Chawnglaizawn, Chhiahtlang Kawn Veng Branch YMA in Zonunpar Cheraw entirin, Sub-Hqrs YMA Cultural Troupe in Mizo Upa Hla leh Lam an entir a, Serchhip Kawnpui South Branch YMA in Thingluang leidawh a Hmanlai Mizo pasal\ha te insual dan an entir bawk a ni. Hei bakah hian Serchhip Town Area a YMA Branch hrang hrang ten Cheraw a huhovin an kan bawk a, Dinthar Branch YMA in Chai lam an entir bawk. Hei bakah hian mimal zaithiam ten zaiin mipui an awi reng bawk a ni.
Kum dang ang bawkin kumin hian Chapchar Kut Miss thlan a ni a, Nl. Baby Lalngaihsaki d/o L.T.Muana Khiangte, Serchhip P&E Veng YMA Branch ami chu Chapchar Kut Miss 2012 atana thlan a ni bawk.
0 comments:
Post a Comment